Fréttir

Guðsþjónusta verður í Þykkvæbæjarkirkju Kl. 20:00 þar sem verðandi fermingarbörn Oddaprestakalls hafa skipulagt og undirbúið guðsþjónustu með presti sínum sr. Guðbjörgu Arnardóttur. Kyndlar lýsa upp gömlu bæjarmyndirnar við afleggjara. Eftir messu, opið skólahús og bókasafn.

Átt þú gömul gleraugu sem þú ert ekki að nota? Lionshreyfingin tileinkar októbermánuði sjónvernd og af því tilefni stendur Lionsklúbburinn Rangá fyrir gleraugnasöfnun í Rangárvallasýslu. Tekið er á móti notuðum gleraugum og þeim gefið nýtt líf þar sem þau eru yfirfarin og svo send til landa þar sem fólk þarfnast þeirra.

Safnahelgi á Suðurlandi 2012- Söfn og ferðaþjónustuaðilar um allt Suðurland og í Vestmannaeyjum bjóða upp á fjölbreytta menningardagskrá helgina 1. – 4. nóvember 2012. Neðar í fréttinni má sjá dagskrá safnahelgarinnar þetta árið.

Veraldarvinir sendu sveitarfélaginu erindi þar sem þau buðu fram þjónustu sína. Smellið á fyrirsögn til að sjá erindið í heild sinni. Veraldarvinir eru íslensk félagasamtök sem rekin eru án hagnaðarsjónarmiða. Samtökin voru stofnuð í júní 2001 og hafa frá upphafi haft umhverfismál í öndvegi. Markmið samtakanna er að stuðla að heilbrigðum lífsháttum og betri umgengni manna við umhverfi sitt.

Miðbær, Dynskálar og Rangárbakkar. Samkvæmt 2. mgr. 32. gr. Skipulagslaga nr. 123/2010 er hér auglýst niðurstaða sveitastjórnar Rangárþings ytra varðandi breytingar á aðalskipulagi. Sveitastjórn Rangárþings ytra samþykkti þann 11. október 2012 tillögu að breytingu á Aðalskipulagi Rangárþings ytra 2010-2022.

Haraldur  Birgir Haraldsson hefur verið ráðinn sviðsstjóri umhverfis-, eigna- og tæknisviðs Rangárþings ytra. Hann tók til starfa 1.okt. s.l. Starfið felur m.a. í sér umsjón með skipulags- og byggingarmálum sveitarfélagsins. Haraldur Birgir er blikksmiður, rekstrariðnfræðingur og byggingafræðingur að mennt. Hann hefur einnig víðtæka reynslu á sviði félagsmála í störfum sínum fyrir bæði sveitarfélög og ríki.

Erindi frá sjálboðaliðasamtökunum SEEDS barst til skrifstofu sveitarfélagsins og er því komið hér á framfæri.  Smellið á fyrirsögn til að lesa erindið í heild. "Við hjá sjálfboðaliðasamtökunum SEEDS erum farin að huga að undirbúningi næsta sumars. Á liðnu sumri áttum við farsælt samstarf við fjölmörg sveitarfélög á landinu og erum fús til að hefja samstaf við fleiri."

Kjörskrá Rangárþings ytra vegna ráðgefandi þjóðaratkvæðagreiðslu um tillögur stjórnlagaráðs að frumvarpi til stjórnskipunarlaga og tiltekin álitaefni þeim tengd, skv. ályktun Alþingis 24. maí 2012, laugardaginn 20. október 2012, liggur frammi á skrifstofu sveitarfélagsins að Suðurlandsvegi 1, Hellu fram að kjördegi.

Eins og síðustu vetur ætlar Ungmennafélagið Hekla að standa fyrir opnu húsi í Íþróttahúsinu á Hellu á föstudögum milli Kl: 16:00 og 17:30. Ekki verður um neina skipulagða dagskrá að ræða og ekki er ætlast til þess að krakkar á skólaaldri mæti án foreldris eða umsjónarmanns, sem er eldri en 18 ára.

Mánudaginn 1. október kl. 18 fór fram fundur sveitarstjórna sveitarfélaganna í Rangárvallasýslu með þingmönnum Suðurkjördæmis í fundarsal Miðjunnar á Hellu. Á fundinn mættu fyrir hönd Rangárþings ytra þau Guðfinna Þorvaldsdóttir, Margrét Ýrr Sigurgeirsdóttir, Magnús H. Jóhannsson, Anna María Kristjánsdóttir, Gunnar Aron Ólason og Gunnsteinn R. Ómarsson.