Íþróttafólk var verðlaunað við hátíðlega athöfn í safnaðarheimilinu á Hellu 11. janúar síðastliðinn. Fjöldi viðurkenningar var veittur og ljóst er að enginn skortur er á öflugu íþróttafólki á öllum aldri í sveitarfélaginu. Það er Heilsu-, íþrótta og tómstundanefnd Rangárþings ytra sem kallar eftir tilnefningum og sér um að úthluta viðurkenningum.
Fjöldi fólks var mættur til að fagna með sínu fólki og kvenfélagið Unnur bauð upp á ekta, heimabakað kvenfélagskaffi.
Íþróttakona Rangárþings ytra árið 2024 er Hanna Rún Ingibergsdóttir. Hún hlaut titilinn „Gæðingaknapi Geysis“ hjá félaginu fyrir árið 2024. Árangur hennar á keppnisbrautinni var eftirtektarverður þar sem hún kom fram með gríðarlegan fjölda hrossa en það sem stóð hæst var án nokkurs vafa 3. sæti í A-flokki á Landsmóti hestamanna á hestinum Sirkus frá Garðshorni á Þelamörk. Hanna Rún hefur einnig tekið virkan þátt í reiðkennslu hjá félaginu við virkilega góðan orðstír og er hún því skýrt dæmi um fyrirmynd innan sem utan vallar. Hanna Rún tók virkan þátt í keppni á árinu 2024 með góðum árangri í nánast öllum greinum hestaíþróttarinnar. Hanna Rún var valin í A-landslið Íslands í hestaíþróttum fyrir komandi tímabil.
Íþróttakarl Rangárþings ytra árið 2024 er Árni Björn Pálsson. Hann er fjölhæfur afreksknapi og var árangur hans á árinu 2024 ótrúlegur. Hæst ber að nefna sigur í A-flokki gæðinga á Landsmóti þar sem hann og Álfamær áttu frábærar sýningar en þau eru einnig í þriðja sæti á stöðulista í gæðingaskeiði. Átti Árni Björn einnig eftirminnilegar sýningar á Seðli frá Árbæ í A flokki. Árni Björn er Íslandsmeistari í tölti á Kastaníu frá Kvistum, hlutu þau silfurverðlaun á Landsmóti í sömu grein og eru efst á WR-listanum í þessari grein í ár. Hann náði góðum árangri á skeiðbrautinni á hestum sínum Ögra frá Horni og Þokka frá Varmalandi. Árangur Árna var ekki einungis á keppnisvellinum heldur stóð hann sig vel á kynbótabrautinni. Hann sýndi 78 hross í kynbótadómi í 106 sýningum með frábærum árangri og átti margar eftirminnilegar sýningar á árinu. Árni Björn Pálsson er einstakur afreksknapi, sönn fyrirmynd fyrir elju sína, jákvæðni og fagmennsku í hvívetna og hann hlaut nafnbótina Knapi ársins 2024 á uppskeruhátíð Landsambands hestamannafélaga og deildar hrossabænda innan BÍ.
Heildarlisti yfir veittar viðurkenningar:
Árni Björn Pálsson - Hestar
Dagur Sigurðarson- Hestar
Elísabet Líf Sigvaldadóttir - Hestar
Guðný Lilja Pálmadóttir - Borðtennis
Gústaf Ásgeir Hinriksson - Hestar
Hanna Rún Ingibergsdóttir - Hestar
Helga Fjóla Erlendsdóttir – Frjálsar
Herdís Björg Jóhannsdóttir – Hestar
Hinrik Bragason - Hestar
Jóhanna Margrét Snorradóttir - Hestar
Jón Ársæll Bergmann - Hestar
Julia Sakowicz – Taekwondo
Lilja Dögg Ágústsdóttir - Hestar
Sara Sigurbjörnsdóttir - Hestar
Þorgeir Óli Eiríksson - Borðtennis
Lið Laugalandsskóla - Skólahreysti framúrskarandi árangur.
Therese Sundberg – Framúrskarandi störf
Guðmundur Jónasson – Framúrskarandi störf
Rangárþing ytra óskar öllum sem hlutu viðurkenningu innilega til hamingju með hvatningu um að halda áfram á sömu braut.