Dagana 20. júní - 12. júlí er hlaupið Friðarhlaup um allt Ísland. Alþjóðlegur hópur hlaupara ber logandi Friðarkyndil á milli byggða til að gefa öllum landsmönnum tækifæri á að taka þátt í viðburði sem hefur að leiðarljósi hugsjónir sáttar og samlyndis. Sérstök áhersla er lögð á þátttöku barna og ungmenna, sem er skipulögð í samstarfi við íþrótta- og ungmennahreyfingar.
Friðarhlaupið, eða Sri Chinmoy Oneness-Home Peace Run, eins og það nefnist á ensku, er alþjóðlegt kyndilboðhlaup sem fer fram í öllum heimsálfum ár hvert. Hlaupið er kennt við indverska friðarfrömuðinn Sri Chinmoy (1931-2007) sem m.a. opnaði íslenska Friðarhlaupið árið 1989.
Ísland hefur tekið þátt í Friðarhlaupinu frá upphafi þess árið 1987 og í ár er hlaupið í 20. sinn. Á þessum tímamótum er ætlunin að hafa hlaupið veglegra en nokkru sinni fyrr og heimsækja öll 74 sveitarfélög á Íslandi. Verkefnið “leggjum rækt við frið” fer fram samhliða Friðarhlaupinu, en það gengur út á að sveitarfélög gróðursetji tré sem er tileinkað friði. Friðartrén minna okkur á að rétt eins og við þurfum að hlúa að og leggja rækt við trjáplöntuna svo hún megi vaxa og dafna, þurfum við að hlúa að og leggja rækt við friðinn í sjálfum okkur og samfélaginu, svo hann megi vaxa og dafna. Fyrsta friðartrénu var plantað á Seltjarnarnesi árið 2011.
Friðarhlaupið bauð Rangárþingi ytra að taka þátt í verkefninu og plantað var friðartré þann 23. júní þegar Friðarhlaupið kom til Hellu.