AUGLÝSING
um nýtingu lands og landsréttinda innan þjóðlendu
Sveitarfélagið Rangárþing ytra auglýsir eftir aðilum til að nýta lóð undir ferðaþjónustu við Álftavatn. Um er að ræða 810 m² lóð, merkt S-1, sbr. deiliskipulag fyrir Álftavatn sem öðlaðist gildistöku með auglýsingu í B-deild Stjórnartíðinda 22. október 2010.
Umrætt svæði er á þjóðlendu (Rangárvallaafrétti) skv. úrskurði óbyggðanefndar í máli nr. 3/2003. Í ljósi þess þarf leyfi sveitarfélagsins Rangárþings ytra til að nýta land og landsréttindi á svæðinu, sbr. 3. mgr. 3. gr. laga nr. 58/1998 um þjóðlendur og ákvörðun marka eignarlanda, þjóðlenda og áfrétta. Jafnframt þarf samþykki forsætisráðuneytisins þar sem umrædd nýting á að vara lengur en til eins árs, sbr. 2. mgr. 3. gr. sömu laga.
Rangárþing ytra lét vinna deiliskipulag fyrir þjónustusvæðið við Álftavatn á árinu 2010. Á svæðinu eru nú þrír gistiskálar auk salernisshúss sem allt fellur undir rekstur Ferðafélags Íslands.
Skilmálar sem einkum verður litið til við ákvörðun um leyfisveitingu á umræddu svæði eru eftirfarandi. Ekki skal litið svo á að röðun þeirra gefi til kynna vægi einstakra skilmála innbyrðis:
- hvernig viðkomandi hyggst nýta lóðina í þeim tilgangi að hafa þar þjónustu fyrir ferðamenn og aðra sem eiga leið um svæðið,
- frágangur mannvirkja og annarrar starfsemi. Sveitarfélagið mun sérstaklega líta til þess að frágangur verði með þeim hætti að samræmist landslagi vel og stingi ekki í stúf við umhverfið að öðru leyti,
- reynsla viðkomandi aðila af rekstri gisti- og afþreyingarþjónustu, s.s. gistihúsa á miðhálendinu og starfsemi fjallaskála,
-reynslu af gerð og viðhaldi göngustíga og annnarra ferðaþjónustutengdra mannvirkja.
Upplýsingar um drög að lóðablaði og deiliskipulag svæðisins má nálgast á skrifstofu Rangárþings ytra, Suðurlandsvegi 1-3, 850 Hellu eða með því að smella hér
Áhugasamir aðilar vinsamlegast sendið tillögu að notkun á umræddu svæði til sveitarfélagsins Rangárþings ytra, eigi síðar en 3. júní nk.
Fh. Rangárþings ytra
Har. Birgir Haraldsson, skipulagsfulltrúi